АР-м гъэсэныгъэмрэ шIэныгъэмрэкIэ и Министерствэ ныдэлъфыбзэм изэгъэшIэн, икъэухъумэн лъэшэу ынаIэ тет. Мы лъэныкъомкIэ гъэхъэгъэшIухэр щыIэх. АдыгабзэмкIэ ыкIи адыгэ литературэмкIэ федеральнэ къэралыгъо гъэсэныгъэ шапхъэхэм яреестрэ гъэсэныгъэ программэр хэхьагъ.
2020-рэ илъэсым ФГОС-м иреестрэ программих хэхьагъ, ахэр адыгабзэмкIэ ыкIи адыгэ литературэмкIэ а 1-рэ классым къыщегъэжьагъэу я 11-м нэс зэреджэщтхэ тхылъхэр ары.
Мы программэхэм ялъытыгъэу тхылъхэм якъыдэгъэкIын ыуж ихьагъэх. Тхылъхэм ямызакъоу, гъэсэныгъэ-методическэ комплекс, электроннэ тхылъхэр, кIэлэегъаджэхэм апае методическэ IэпыIэгъухэр къыдагъэкIыщтых. Пэублэ классхэм апае тхылъхэр, электроннэ тхылъхэр, IофшIэнхэр зыщагъэцэкIэщтхэ тетрадьхэр, кIэлэегъаджэм пае пособиехэр арагъэгъотыщтых.
УФ-м лъэпкъыбзэхэм якъэухъумэнкIэ ыкIи язэгъэшIэнкIэ Фондым зэхищэгъэ зэнэкъокъум 2021-рэ илъэсым имэлылъфэгъу мазэ АР-м гъэсэныгъэмрэ шIэныгъэмрэкIэ и Министерствэ хэлэжьагъ. А 1 — 4-рэ классхэм ыкIи я 5 — 9-рэ классхэм ащеджэхэрэм апае агъэхьазырыгъэ гъэсэныгъэ-методическэ комплексхэу «Адыгабзэ» зыфиIохэрэм текIоныгъэ къыдахыгъ. ЫпэкIэ зигугъу къэтшIыгъэ Фондым ахэм апэIухьанэу сомэ миллиони 8 къафитIупщыщт.
АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, республикэм къыщыдагъэкIырэ тхылъхэр федеральнэ переченым хагъэхьанхэр ары пшъэрылъ шъхьаIэр. 2022-рэ илъэсым ащ фэгъэхьыгъэ макетхэр агъэхьазырыщтых.
Джащ фэдэу «Литературное чтение на родном языке» зыфиIорэр а 1 — 4-рэ классхэм ыкIи «Родная литература» я 5 — 11-рэ классхэм апае зэхагъэуцох. Ащ пэIухьащт сомэ миллиони 8-р республикэ бюджетым къыхахыщт.
Къыхэгъэщыгъэн фае 2020-рэ илъэсым я 10 — 11-рэ классхэр зэреджэхэрэ «Адыгэ ныдэлъфыбзэр» федеральнэ переченым зэрэхэхьагъэр.
ДЕЛЭКЪО Анет.
Адыгэ макъ
