Мы ди Зэмантым* хуэдэ псы гуэрэм мы ди Шэрэфием* хуэдэ зы кой* гуэрэ Iуст, жаIэ.
Аддэ Хэкужьым. Зи бзаг’э зырамыпэсау[э], фIыу[э] зэрылъагъуу а койм куэду зэаркъэдэшу* фызитIи дэст.
Шыбзэхьэху* зыIэпахыу а[п]хуэдэт, яни*.
ИIэс аби, а фызитIыр псыхьэ мы ди Зэмантым хуэдэ псым къыдыхьас.
Зыр плъэри адрыщIым зы шу къилъагъури, ари зэпэщси, ари зылI ещхьс, жиIас.
– Зыр мащIэIуэс, – жиIас адрей фызым.
Ар нэхъ хэмылъу фызитIым жьэ ягъабз[э]у хуежьас*. – ТIу!
– Уэ нитIыр зэхуэдэмэ, ялъагъур пэжс. – Щы!
– Уэ Iэнэр лъэкъуищмэ, мэув. – ПлIы!
– Уэ жэмым и быдзиплIыр зэхуэдэмэ, шафIэс. – Тху!
– Уэ Iэхъуэмбитхур зэхуэдэмэ, шэрыуэс. – Хы!
– Я, хышхуэм хэхуэу хэт къела? – Блы!
– Уэ блэр зэуар аркъэным щощтэ. – И!
– Уэ им гъущIыжьри ехъу! – Бгъу!
– СогъэщIагъуэри, Тхьэу[э] зи КъурIэн, схуэмыух!
– Сыт бгъэщIагъуэр?
– Дыгъужьибгъум аргъуей кI’эбдз яхуэмышхыу слъэгъуас.
– Алэхь-алэхь, дыгъужьhэр цIыкIу хъунтэм?
– ЦIыкIу-мыцIыкIуми, Алъхъоhэ* я шы къуэлэныжьым хуэдизтэм.
– Алъхъоhэ я шы къуэлэныжьыр езыр цIыкIу хъунт?
– ЦIыкIу-мыцIыкIуми, бгы лъапэм здэщытым бгыщхьэм дэIэбейуэрэ мэхъуакIуэ, тхьэ…
– Бгыр цIыкIу хъунт?
– ЦIыкIу-мыцIыкIуми, щIалэр дэплъеймэ, и пыIэр щхьэрохумэ…
– ЩIалэр цIыкIужьей хъунтэм?
– ЦIыкIу-мыцIыкIуми, псыкъуийм йоIэбыхри псыр кърегъахъуэмэ…
– Псыкъуийр куу хъунтэIым?
– Куу-мыкууми, пщэдг’ыжьым ебдзыха пэгуным и Iэуэлъауэр пщыхьэщхьэрат щызэхэпхыр…
– Махуэр кI’эщI хъунт?
– КI’эщIми, кI’ыхьми, пщэдг’ыжьым къалъхуа шыщIэм пщыхьэщхьэм пщыщауэр мэшэс.
– Тобэ, тобэ, ярэби!..ЛIыфIыгъэ зэримыгъыхь[э]у фызитIыр псыхъуэм къыдэкI’ыжыри я унэ къэкIуэжаhэс.
Мис мы[п]хуэдэ шыпсэhэм ди бэбэжь** рэхьмэтлик’ым жэщкI’э дыкъригъэдаIуэу щытас.
[Мэдыхьэшх].КъэзыIуэтэжар Къэрэшей С., 2005 илъ.
*Зэманты – Iузнейлэм пхрыж псым аращ зэреджэр.
Дэлъадэми, блэжми, Астемырей, Ерэнщыхьэр-Къундетей, Алъэсчырей, ХьэтIохъущыкъуеижь, КIурашынхьэблэ, Къайнар, Локъуажэ, Къунашей, Аслъэнхьэблэ, Хьэзей жылэхэр Зэмантыпсым къызэренэкIри, Сейхьан псышхуэм холъэдэж.
*Шэрэфие – Iузнейлэм ит зы къэбэрдей къуажэщ, адыгэбзэкIэ Астемырей жыхуаIэращ.
*кой – къуажэ, жылэ.
*зэаркъэдэшу – зэныбжьэгъуу, жыхуиIэщ.
*шыбзэхьэху – кхъузанэхьэху зэIэпахыу, жыхуиIэщ. ЗэкIэлъыкIуэу, зэкIэлъыIэбэу жиIэущ къызэрыбгурыIуэн хуейр.
*яни – сытми, дауэ хъуми.
*жьэ ягъэбз[э]у хуежьас – жьэнахуагъкIэ зэпеуэу щIадзащ, жыхуиIэщ.
*Алъхъоhэ – Хэку Джылахъстэнейм иса пщы лъэпкъщ, къуэпскIэ Инал и щIэблэм щыщщ. Лъэпкъым щыщхэр ноби щыIэщ, Хэкуми щопсэу, Тыркуми Истамбыл, Анкара дэсхэщ.
*бэбэжь – адэшхуэ.
